KK/Prabhupada 1058 - Бһагавад-гитаны баяндаушы — Тәңір Шри Кришна
660219-20 - Lecture BG Introduction - New York
Бһагавад-гитаны баяндаушы — Тәңір Шри Кришна. Бһагавад-гитаның әр бетінде — Кришна — Құдайдың Түптұлғасы, Бһагаван деп ескертілген. Әрине, бһагаван сөзі кейде кез келген құдіретті тұлғаға я кез келген құдіретті деваға да қатысты қолданылса, керісінше, бұл өлеңде бһагаван сөзі ең ұлы тұлға — Шри Кришнаға қатысты қолданылып отыр, сондай-ақ Тәңір Шри Кришнаны барша ачарйалардың бір ауыздан мойындағанын білуіміз шарт: Олар Шаңкарачарйа, Рамануджачарйа, Мадһвачарйа, Нимбарка Свами, Шри Чаитанйа Маһапрабһу т.с.с. Индияда көптеген беделді ғалымдар мен ачарйалар, Веда білімінің беделдері болған. Олардың бәрі де, Шаңкарачарйа да Шри Кришнаның Құдайдың Түптұлғасы екенін мойындаған. Тәңірдің Өзі де Өзін — Құдайдың Түптұлғасымын деп жариялайды Бһагавад-гитада. Браһма-самһита мен барша Пураналар, әсіресе Бһагавата Пурана Шри Кришнаның Құдайдың Түптұлғасы екенін мойындаған: кришнас ту бһагаван свайам (ШБ 1.3.28). Сондықтан Бһагавад-гитаны қаз-қалпында Құдайдың Түптұлғасының Өз аузынан тікелей алуға міндеттіміз. Сонымен Бһагавад-гитаның төртінші тарауында Тәңір былай дейді: имам вивасвате йогам проктаван аһам авйайам вивасван манаве праһа манур икшвакаве `бравит (БГ 4.1). эвам парампара-праптам имам раджаршайо видуһ са каленеһа маһата його наштаһ парантапа (БГ 4.2). са эвайам майа те `дйа йогаһ проктаһ пуратанаһ бһакто `си ме сакһа чети раһасйам һй этад уттамам (БГ 4.3).
Мәселе мынада... Тәңір Кришна Арджунаға былай дейді: "Бһагавад-гитадағы осы йога ілімін бірінші Күн девасына баян еттім, Күн девасы Мануға түсіндірді, Ману Икшвакуға түсіндірді, осылайша ұстаздан шәкіртке табыстау тізбегі арқылы осы йога ілімі бір баяндаушыдан келесісіне табысталып отырады, уақыт өте келе бұл ілім қазір жоғалған. Сондықтан саған дәл сол йога ілімін, Бһагавад-гитаның, яғни Гитопанишадтың дәл сол көне йога ілімін қайта айтып отырмын. Себебі сен Менің бһактам әрі жан досым болғандықтан, тек сен ғана ұға аласың." Бұл Бһагавад-гитаның тек Тәңірдің бһактасына ғана арналған ғибратты ілім екенін айғақтайды. Джнани, йоги және бһакта деген үш түрлі йогилар бар. Яғни имперсоналистер я медитацияға шомушылар я құдайшыл бһакталар. Мұны осы өлеңде анық ескертіп отырған Тәңір Арджунаға былай дейді: "Мен сені парампараның бірінші шәкірті етіп, баяндап отырмын. Ежелгі парампара (ұстаздан шәкіртке табыстау тізбегі) қазір үзіліп қалғандықтан, Күн девасынан басқаларына табысталып отырған сол парампараны қайтадан орнатқым келіп отыр. Осы білімді ал да, тарат. Бһагавад-гитатану йога ілімі енді сен арқылы тарайды. Бһагавад-гитатану ілімінің беделі бол." Бұл өлең Бһагавад-гитаның тек Тәңір Кришнаның бһактасы, тікелей шәкірті, сондай-ақ сырлас жан досы Арджунаға ғана баяндалып отырғанын айғақтайды. Сондықтан Бһагавад-гитаны тек Кришнамен қасиеттес бһакта ғана ұғады. Бұл ол Құдаймен тікелей қарым-қатынастағы бһакта болуы шарт деген сөз.